ಪೊಲೀಸ್ ಪೇದೆ ನೇಮಕಾತಿ ವಯೋಮಿತಿ ಹೆಚ್ಚಳಕ್ಕೆ ಆಗ್ರಹಿಸಿ ನಾಳೆ ಧಾರವಾಡದಲ್ಲಿ ವಿವಿಧ ಸಂಘಟನೆಗಳು ಕರೆ ಕೊಟ್ಟಿರುವ ಧಾರವಾಡ ಚಲೋ ಬೃಹತ್ ಪ್ರತಿಭಟನೆ ನಡೆಯಲಿದೆ.
ಧಾರವಾಡ ವಿದ್ಯಾಕಾಶಿ ಎಂದು ಹೆಸರಾಗಿದ್ದು, ಕನ್ನಡ ನೆಲ ಜಲ, ಭಾಷೆ ವಿಚಾರದಲ್ಲಿ ಧಾರವಾಡದಲ್ಲಿ ನಡೆಯುವ ಯಾವದೇ ಹೋರಾಟ, ಚಳುವಳಿಗೆ ಸರ್ಕಾರ ಕಿವಿಗೊಡುತ್ತ ಬಂದಿದೆ. ಹೀಗಾಗಿ ಧಾರವಾಡದಿಂದಲೇ ದೊಡ್ಡ ಹೋರಾಟ ಆರಂಭಿಸಲು ಸಂಘಟನೆಗಳು ಮುಂದಾಗಿವೆ.
ಪ್ರತಿ ವರ್ಷ ಧಾರವಾಡ ನಗರಕ್ಕೆ ಸರ್ಕಾರಿ ಕೆಲಸ ಗಿಟ್ಟಿಸಲು ಸಾವಿರಾರು ಯುವಕರು ತರಬೇತಿ ಪಡೆಯಲು ಬರುತ್ತಿದ್ದು, ನಾಳಿನ ಹೋರಾಟ ಸರ್ಕಾರಕ್ಕೆ ಬಿಸಿ ಮುಟ್ಟಿಸಲಿದೆ.
ಧಾರವಾಡದಲ್ಲಿ ತರಬೇತಿ ಕೇಂದ್ರಗಳು ವರ್ಷದಿಂದ ವರ್ಷಕ್ಕೆ ಹೊಸದಾಗಿ ಆರಂಭವಾಗುತ್ತಿದ್ದು, ಕರ್ನಾಟಕ ಫೈಲ್ಸ್ ಗೆ ಸಿಕ್ಕ ಮಾಹಿತಿಯಂತೆ, ಸ್ಪರ್ಧಾತ್ಮಕ ತರಬೇತಿ ಕೇಂದ್ರಗಳು ನಾಳಿನ ಹೋರಾಟಕ್ಕೆ ಎಲ್ಲ ತರದಿಂದಲೂ ಸಾಥ ನೀಡಿವೆ ಎನ್ನಲಾಗಿದೆ.
ಆದರೆ ಎಲ್ಲಿಯೂ ತರಬೇತಿ ಕೇಂದ್ರಗಳ ಹೆಸರು ಬಹಿರಂಗವಾಗದಂತೆ ಎಚ್ಚರಿಕೆ ವಹಿಸಲಾಗಿದೆ. ಮೂಲಗಳ ಪ್ರಕಾರ, ಧಾರವಾಡದಲ್ಲಿ ಇರುವ ಸ್ಪರ್ಧಾತ್ಮಕ ತರಬೇತಿ ಕೇಂದ್ರಗಳ ಒಟ್ಟು ವಾರ್ಷಿಕ ವಹಿವಾಟು 250 ಕೋಟಿ ರೂಪಾಯಿ ದಾಟುತ್ತಿದ್ದು, ನೇಮಕಾತಿ ಆರಂಭವಾದರೆ ಕೇಂದ್ರಗಳು ಉಳಿಯಬಹುದು ಎನ್ನುವ ಲೆಕ್ಕಾಚಾರದಲ್ಲಿದ್ದಾರೆ.
ಈ ಮೊದಲೇ ತೀರ್ಮಾನಿಸಿದಂತೆ ನಾಳಿನ ಬೃಹತ್ ಪ್ರತಿಭಟನೆ ಶ್ರೀನಗರ ಸರ್ಕಲ್ ದಿಂದ ಆರಂಭವಾಗಲಿದೆ. ಚಾಮರಾಜನಗರದಿಂದ ಬೀದರವರೆಗೆ ನಾಳಿನ ಹೋರಾಟಕ್ಕೆ ಅಬ್ಬರದ ಪ್ರಚಾರ ನೀಡಲಾಗಿದ್ದು, ದೊಡ್ಡ ಸಂಖ್ಯೆಯಲ್ಲಿ ನಿರುದ್ಯೋಗಿ ಯುವಕರು ಉದ್ಯೋಕ್ಕಾಗಿ ಧಾರವಾಡ ಚಲೋ ಹೋರಾಟದಲ್ಲಿ ಭಾಗವಹಿಸಲಿದ್ದಾರೆ.
